Juvenile Justice Law, dakong tamparos sa hustisya?

Gikabalak-an sa pamilya sa mga nabiktima sa halapad nga pagpamusil sa usa ka eskwelahan sa Tacloban City nga dili masilotan ang duha ka mga suspek sa krimen tungod kay mga menor de edad man sila, 14 anyos ug 15 anyos.

Mamahimo man silang ma-custody apan mahulog gihapon sa special treatment ang ilang matagamtam.

Ang hinungdan niini mao ang Juvenile Justice Act nga gipanday kaniadto ni Senador Kiko Pangilinan.

Dili madawat sa mga hingtungdan nga dili mapanubag ang mga batang kriminal tungod sa kabug-at sa ilang nahimo nga sala.

Samtang husto nga protektahan ang mga katungod sa kabataan, lahi na ang sitwasyon kon ang krimen giplano, gihimo pinaagi sa linuog nga pagpamusil gamit ang armas, ug mikalas og daghang kinabuhi.

Ang pagka-menor de edad dili angay himoong tamparos sa hustisya o taming aron makalingkawas sa silot sa ingon niini ka dako nga salaod.

Kon duna silay igong panimuot sa pagplano, pag-ikyas agi sa luyo, ug pagpamusil sa ilang mga kauban, duna usab unta silay igong panimuot sa pag-atubang sa saktong silot.

Kinahanglan na gyud nga rebyuhon sa atong mga magbabalaod kining maong balaod para sa mga "heinous crimes" o grabeng krimen nga gihimo sa mga menor de edad.

Kung dili kini usbon, morag gihatagan lang nato og mensahe ang uban nga puyde ra silang mopatay kay dili bitaw sila mapursigi sa balaod.

Pipila sa atong pamalandongan, Kon tinuod nga bullying ang nag-unang mitsa niini, pamatud-an lang niini nga ang bullying makahilo ug makaguba sa pangisip sa usa ka bata.

Dili kini basta-basta nga "bata pa bitaw" nga sitwasyon.

Kinahanglan ang mas seryoso nga aksyon sa mga eskwelahan sa pag-atiman sa mental health sa mga tinun-an ug sa pagsumpo niining maong bisyo.

Ang iresponsableng paghupot og armas: nganong sayon nga nakakuha og armas? Ang usa service firearm pa gyud sa usa ka pulis, ug ang usa rehistrado sa ahensya sa Sugbo.

Adunay dakong kakuwang sa disiplina ug seryosong tulubagon ang mga tag-iya niining maong mga armas. Dili kay ang mga bata lang ang angay imbestigahan, kondili lakip na ang mga hamtong nga nagpasagad sa ilang mga armas.

Makapaalarma nga giingong gisundog sa mga suspetsado ang mga nahitabong school shootings sa Amerika.

Ang impluwensya sa internet, inubanan sa mga cryptic posts nga wala mabantayan, nagpakita nga dako ang kakuwang sa pag-gabay ug pag-monitor sa mga ginikanan o guardian sa digital nga kinabuhi sa mga bata.