RTWPB nipasalig nga dunay umento sa suhulan

CEBU, Philippines — Gisiguro sa Regional Tripartite Wages and Productivity Board-7 (RTWPB-7) sa mga mamumuo sa rehiyon nga adunay umaabot nga umento sa suhulan, bisan og wa pa masayri ang eksaktong kantidad tungod kay mopahigayon pa ang wage board og public consultations ug public hearings.

Si RTWPB-7 chairman ug Department of Labor and Employment-7 (DOLE-7) Regional Director Atty. Roy Buenafe, miingon nga wala nay pagduhaduha adunay ipagawas nga wage adjustment sa Central Visayas, apan ang gihisgutan karon mao na ang angay nga lebel sa pag umento.

Miingon si Buenafe nga magsugod ang wage board sa pampublikong konsultasyon sa Hunyo 25, diin hatagan og higayon ang grupo sa labor, mga employers, ug uban pang stakeholders nga ipresenta ang ilang mga baruganan ug ebidensya bahin sa gisugyot nga wage adjustment.

Gipadayag usab niya nga giapil sa board ang pagtan-aw sa posibleng “supervening conditions” o mga kalamboan sa ekonomiya nga makaimpluwensya sa pagtimbang sa suholan, lakip na ang kausaban sa inflation, cost of living, ug regional economic performance.

Matod niya, importante kini nga mga hinungdan sa pag-umol og balanse ug lig-on nga wage order.

Sumala pa ni Buenafe, tinguha sa RTWPB-7 nga makapagawas og bag-ong wage order unya sa Oktubre 4, nga mao ang anibersaryo sa kataposang implementasyon sa wage adjustment sa rehiyon.

Sa laing bahin, gipasabot ni DOLE Secretary Francis Tolentino nga ang ahensya dili manghilabot sa proseso sa wage setting, ug gipadayag nga ang wage adjustment gihimo sa mga independent regional wage boards pinaagi sa tripartite consultation nga naglakip sa gobyerno, labor, ug management sectors.

Gihimo niya ang pamahayag atol sa iyang pagbisita sa DOLE-7 regional office.

Gilibot ni Tolentino ang DOLE-7 office ug nasaksihan ang turnover sa livelihood assistance ngadto sa usa ka benepisyaryo nga nagpakita sa padayon nga suporta sa gobyerno sa mga vulnerable sectors sa Central Visayas.

Ang Negosyo sa Kariton (Nego-Kart) usa ka livelihood support program alang sa mga ambulant vendors ug disadvantaged workers. Naghatag kini og ready-to-use nga mobile vending package aron ang mga benepisyaryo makasugod o makapalambo sa gamay nga negosyo.

Sumala ni Atty. Buenafe, naghatag sila og P50,000 nga tabang sa usa ka benepisyaryo, diin P35,000 alang sa electric bike ug P15,000 alang sa produkto sama sa prutas.  MEL BANAT NEWS