Discaya gitugotan sa korte nga makapiyansa

CEBU, Philippines — Gitugotan sa Regional Trial Court (RTC) sa Dakbayan sa Lapu-Lapu ang kontrobersiyal nga kontratista nga Cezarah Rowena “Sarah” Discaya nga makapiyansa og P1 milyon alang sa iyang temporaryong kagawasan.

Si Discaya nag-atubang kini og kaso kalabot sa giingong P96.5 milyon nga ghost flood control project sa Davao Occidental.

Base sa resolusyon nga gipetsahan niadtong Hulyo 7, 2026 si RTC Judge Nelson Leyco sa Branch 27 nagkanayon nga wala pa makapresenta ang prosekusyon og lig-on nga ebidensiya aron mapamatud-an ang aktibong partisipasyon ni Discaya sa giingong malversation of public funds pinaagi sa pagpalsipikar sa mga pampublikong dokumento.

Gitugotan usab sa korte si DPWH Davao Occidental Acting Finance Section Chief Czar Ryan Ubungen nga makapiansa og P300,000.

Apan gibalibaran ang mga petisyon alang sa piyansa sa walo ka ubang akusado lakip ang opisyales sa Department of Public Works and Highways (DPWH) ug usa ka opisyal sa St. Timothy Construction Corp. human nakita sa korte nga lig-on ang ebidensiya batok kanila.

Ang kaso nitumaw gikan sa giingong anomaliya sa implementasyon sa P96.5 milyones nga flood control project sa Culaman River sa Jose Abad Santos, Davao Occidental.

Matud usab sa prosekusyon nga si Discaya mao ang tinuod nga benepisyaryong tag-iya sa St. Timothy Construction Corp. ug nalambigit sa plano.

Gitumbok sa korte nga walay saksi sa prosekusyon nga nakapamatuod sa direktang partisipasyon ni Discaya sa proyekto.

Gipasabot sa huwes nga ang pagbutang og piyansa dili pasabot nga inosente ang akusado.

Ang paghusay sa petisyon alang sa piyansa temporaryo lang ug ang isyu sa kriminal nga tulubagon hukman pa sa hingpit nga trial.

Sa laing bahin, base sa resolusyon nga adunay ulohan nga “Reflections Beyond the Case: A Humble Plea for Re-Examination”, giila ni Leyco nga ang iyang desisyon mahimong tan-awon nga kapakyasan sa pakigbatok sa korupsiyon apan obligado siya’ng mosunod sa balaod.

Si Discaya ug ang walo ka opisyal sa DPWH natanggong diha sa Lapu-Lapu City Jail niadtong Disyembre 20, 2025, human sila napasakaan og kaso.

Nag-atubang usab si Discaya ug ang iyang bana nga si Pacifico “Curlee” Discaya og laing non-bailable nga kaso kalabot sa giingong P53.9 milyon nga ghost flood control project sa Calumpit, Bulacan. (BANAT NEWS)