Serbisyo sa Bayan ang tunay na sukatan ng pamahalaan

SA panahon ng matinding sakuna, mahalagang kumilos agad ang pamahalaan. Kaya naman mabuting bagay na nakapaghatid ng agarang tulong ang iba’t ibang ahensya ng gobyerno sa mga pamilyang naapektuhan ng magnitude 7.8 na lindol sa Sarangani, General Santos City, at iba pang bahagi ng Mindanao.

Ngunit para sa mga karaniwang mamamayan, lalo na ang mga nawalan ng bahay, kabuhayan, at mahal sa buhay, hindi sapat ang papuri at pagkilala sa loob ng Kongreso. Ang mas mahalaga ay ang pagtiyak na ang tulong ay tunay na nakararating sa bawat pamilyang nangangailangan at hindi natatapos sa mga anunsyo at seremonya.

Totoong dapat kilalanin ang mabilis na pagkilos ng mga ahensya ng gobyerno, mga sundalo, pulis, health workers, at mga volunteer na walang pagod na tumulong sa oras ng pangangailangan. Ngunit ang tunay na sukatan ng tagumpay ay hindi kung ilang resolusyon ang naipasa, kundi kung gaano kabilis naibalik ang normal na pamumuhay ng mga apektadong komunidad.

Sabi ni House Speaker Bodji Dy,  ang mga nasalanta ay nangangailangan ng higit pa sa relief goods. Kailangan nila ng matibay na tahanan, maayos na ospital, ligtas na paaralan, maibabalik na kabuhayan, at pangmatagalang plano upang hindi na maging paulit-ulit ang hirap na dinaranas sa tuwing may sakuna.

Hindi rin dapat matapos sa agarang pagtugon ang responsibilidad ng gobyerno. Dapat palakasin ang paghahanda sa sakuna, pagbutihin ang mga imprastraktura, at tiyaking handa ang bawat komunidad sa mga darating pang kalamidad.

Sa huli, hindi papuri ang pangunahing hinihingi ng mga mamamayan. Ang gusto nila ay konkretong aksyon, mabilis na serbisyo, at tuluy-tuloy na pag-alalay hanggang sa tuluyan silang makabangon. Sapagkat ang tunay na sukatan ng mabuting pamamahala ay hindi ang dami ng pagkilalang natatanggap, kundi ang dami ng buhay na naiaahon mula sa pagdurusa.