Czechia giba sa depensa ng USA
MANILA, Philippines — Pinalo ng USA ang dalawang sunod na panalo matapos nilang dominahin ang Czech Republic, 25-17, 25-12, 25-16 sa Philippine Leg ng Volleyball Nations League (VNL) women’s week 2 na nilaro sa PhilSports Arena sa Pasig City kahapon.
Nirehistro ng American netters ang 5-1 karta sa kompetisyon na suportado ng Philippine Sports Commission, (PSC) sa pamumuno ni chairman Patrick “Pato” Gregorio.
Unang pinagpag ng USA ang Dominican Republic, 25-20, 25-19, 25-12 noong Miyerkules sa unang araw ng labanan dito sa Pilipinas.
Naghabol pa ng isang puntos ang USA, 8-9 sa third frame, pero humarurot sila ng 9-0 run upang agawin ang lamang at hawakan ang eighth-point lead, 17-9.
Pinamunuan ni Jordan Thompson ang opensa para sa USA sa tinikadang 15 points mula sa 14 attacks at isang block, tig- 11 puntos naman ang inambag nina Chiaka Ogbogu at Logan Eggleston habang may siyam ang kinana ni Avery Skinner.
Walang player mula sa Czechia ang umiskor ng double-digit, tumipa lamang si Magdalena Jehlarova ng eight points, wala pa rin silang naipapanalo sa Philippine Leg sa dalawang salang.
Nalasap ng Czechia ang pangatlong talo sa anim na laban.
Pahinga ang USA ngayong araw, pero mapapalaban sila bukas, (Sabado) dahil makakatapat nila ang defending champion Italy.
Sisikapin naman ng Czechia na makasungkit ng panalo sa Manila, pagharap nila ngayong araw kontra Japan.
- Latest
