Cebu mibugha sa pasay alang sa ika-10 nilang daog sa MPBL

CEBU, Philippines — Ang Cebu Greats mipayaka sa Pasay Voyagers, 82-72, alang sa ikatulo nilang sagunson nga daog sa Maharlika Pilipinas Basketball League (MPBL) Season 8 niadtong Martes sa gabii, Hunyo 16, didto sa Cuneta Astrodome sa dakbayan sa Pasay.

Si Mark Meneses mikolekta og 19 puntos, siyam ka rebounds, usa ka assist, usa ka steal ug tulo ka blocks samtang si Camillus Altamirano miduhang og 11 puntos, duha ka rebounds, tulo ka assists, ug usa ka steal alang sa Greats, nga midaog sa ikawalong higayon sa katapusan nilang siyam ka duwa aron duyogan ang Biñan Tatak Gel sa ikatulong dapit sa South Division standings uban ang managsamang 10-3 rekords.

Ang way pagbahar nga si Dondon Hontiveros mitali og 10 puntos uban ang upat ka rebounds ug usa ka assist alang sa Cebu, nga alkansi og tres puntos, 10-13, sa sayong bahin. Apan ang Greats milusad og mainit nga 15-5 rally aron kontrolahon ang duwa, 25-18,  sa hingpit human sa unang kuwarter.

Ang bentaha sa Cebu miburot ngadto sa 20 puntos, 54-34, sa halftime.

Igo lamang nakapaduol ang Pasay ngadto sa 11 puntos,  62-73, gumikan kay ang Greats miabli sa katapusang kuwarter pinaagi sa pagkadlit og pito ka sagunson nga puntos aron inaton og balik ang ilang labaw ngadto sa 18 puntos, 80-62, sa floater ni Simon Camacho sa nahibilin nga 6:34 sa duwa.

Sila si Brian Wendel Hilario ug Nico Quinal mi-iskor og 14 puntos matag usa sa way kapuslanan kay ang Pasay natagak sa 7-6.

Ang Cebu makigharong sunod batok sa Bulacan Kuyas karong Hunyo 23 didto sa Olivarez College Gymnasium sa siyudad sa Parañaque.