Ayuda sa senior citizens iapod-apod karong buwana

CEBU, Philippines — Gianunsiyo ni Cebu City Mayor Nestor Archival, Sr. nga ipahigayon karong Hunyo 19, 2026, ang pag-apod-apod sa pinansiyal nga ayuda alang sa mga senior citizen.

Matud sa mayor nga ang ipanghatag nga ayuda alang kini sa mga buwan sa Abril, Mayo, ug Hunyo.

Si Archival nagkanayon nga ang maong programa usa ka konkretong pamaagi sa kagamhanan sa pagpakita sa pag-atiman ug paghatag og dugang nga suporta sa sektor sa mga senior citizen pinaagi sa pinansiyal nga tabang.

Nagpadayon usab ang nagkadaiyang buhatan sa syudad alang sa mga pagpangandam aron masiguro nga hapsay, organisado ug episyente ang proseso sa distribution sa ayuda sa gitakdang petsa.

Gihangyo sa lokal nga kagamhanan ang tanang benepisyaryo ug ang ilang mga pamilya nga magbantay sa mga opisyal nga anunsiyo ug mosunod sa mga giya nga ipagawas aron malikayan ang kalibog, taas nga linya ug kahuot sa mga lugar nga ipahigayon ang pag-apod-apod.

Sa pagkakaron, wala nitugot ang mayor nga magpadala og authorization ang mga senior citizen nga dili makakobra sa ilang mga tabang pinansiyal apan gisugyot usab sa mayor nga ipahigayon ang house-to-house distribution aron padayon nga makadawat ang mga senior citizen nga bedridden ug lisod na nga makabiya sa ilang panimalay. BDB BANAT NEWS