Cebu City nisagop sa Mabuhi Gesture

CEBU, Philippines — Opisyal na nga nisagop ang kagamhanan sa Dakbayan sa Sugbo sa “Mabuhi Gesture” isip opisyal nga lihok sa pag-abi-abi ngadto sa publiko alang sa mga frontline public service offices.

Kini human napasar ang resolusyon nga gipanginahanan ni Konsehal Nyza Archival, atol sa regular session sa konseho sa siyudad niadtong Mayo 19, 2026.

Ang Mabuhi Gesture mao ang pagbutang sa tuo nga kamot ibabaw sa wala nga bahin sa dughan uban sa gamay nga pagduko sa ulo.

Kini nagsimbolo sa pagkamaabi-abihon sa Filipino, garbo sa kultura, ug respeto.

Gamiton kini isip pamaagi sa pagpangumusta ug pagpakita sa maayong pakig-uban sa katawhan.

Giawhag ang mga empleyado sa Public Assistance and Complaints Desk (PACD) ug uban pa’ng mga kawani nga direktang mo atubang sa publiko nga gamiton ang Mabuhi Gesture sa ilang adlaw-adlaw nga paghatag og serbisyo.

Unang gipaila ang maong resolusyon atol sa seminar sa Filipino Brand of Service Excellence (FBSE) nga gipahigayon sa Cebu City Tourism Office uban sa pakigtambayayong sa Department of Tourism (DOT).

Nahiuyon usab ang resolusyon sa Akta Republika No. 11032 kun “Ease of Doing Business and Efficient Government Service Delivery Act of 2018” nga nag-awhag sa mga ahensiya sa gobiyerno sa paghatag og episyente ug customer-friendly nga serbisyo. Matud sa opisyales sa siyudad nga ang paggamit sa usa ka parehas nga institutional greeting makatabang aron sa pagpalambo sa propesyonalismo, pagpalig-on sa kulturanhong identity ug pagpaayo sa kalidad sa frontline public service sa siyudad.

Gitugotan usab sa konseho ang pagpalapad sa implementasyon sa maong resolusyon ngadto sa buhatan sa city administrator, Human Resource Development Office (HRDO) ug uban pa’ng hingtungdan buhatan aron masiguro ang hapsay ug hustong pagpatuman niini. — Rachel E. Wenceslao (BANAT NEWS)