Sama sa Goldfish

Matud pa ni Lanao del Sur Rep. Zia Alonto Adiong, daghang mga pribadong abogado ang mitanyag sa ilang serbisyo pro bono aron moapil sa House prosecution team alang sa impeachment trial ni Bise Presidente Sara Duterte.  Kon tinuod man, unsa kahay katuyoan sa maong mga abogado: kumbinsido ba sila nga sad-an ang bise presidente o buot lang nila mosakay sa maong isyu aron magpasikat? Angayan tamdan ang pahimangno nga nag-ingon, “Tungod sa imong pangandoy nga mahimong bantogan, nahisama ka na hinoon sa goldfish sulod sa aquarium nga kanunay’ng bantayan ug dula-dulaan sa tag-iya.” Madahaan!

Walk-out sa mga senador

Mi-walk out ang mga senador nga sakop sa minority bloc agi’g pagpadayag sa ilang kusganon’g pagsupak sa kabubot-on sa mayoriya nga desisyonan na ang proposal ni Senador Rodante Marcolete nga magtugot sa mga miyembro sa senado nga makabotar atol sa session pinaagi sa online channels.    Angayan nga diskutihon pag-ayo ang maong proposal ni Marcoleta kay sukwahi kini sa naandan nga lagda.  Labaw pa, tukionon pa usab ang extent sa katungod sa usa ka miyembro nga absent atol sa session. Kay matud pa bitaw, “Ang sayop magpabilin nga sayop bisan kon ang kadaghanan mosuporta niini.  Kay sa mga butang nga may kalabot sa konsiyensya, walay luna ang balaod sa mayoriya.”  Muleeng!

Nagpabilin ang kalag

Gisita sa COA ang pagpalit sa kagamhanan sa dakbayan sa Mandaue sa yuta sa Barangay Cambaro balor og P32 milyones human masayran sa mga auditor nga daghan sa mga giingong nagbaligya ang mitaliwan na sa dihang gihimo ang deed of sale.   Kon adunay ghost projects, aduna sab diay “ghost sellers”. Husto ang panultihon nga, “Bisan kon mitaliwan na ang tag-iya sa yuta ug balay, ang ilang kalag nagpabilin pa man gihapon’g nagpuyo sulod niini.” Pagkatoytoy!

Scam sa online booking

Naalarma ang Regional Anti-Cybercrime Unit (Racu) 7 sa nagkadaghang reklamo gikan sa mga lokal nga turista nga nabiktima sa online booking scam pinaagi sa mga pekeng Facebook page sa mga sikat nga resort ug hotel dinhi sa Central Visayas.   Tungod sa kasayon sa online booking, sayon na lang usab kaayo sa mga scammer ang pagpangilad sa ilang mga biktima. Komento pa sa akong amigo, “Ang abilidad karon sa pagpangilad, nisaylo na ug nilabaw pa sa atong abilidad pag-ila ug pagdetect niini.”  Mao maan!

Libog-libogon ang kaaway

Mopasaka ang PNP-CIDG og kaso nga obstruction of justice batok kang Senador Robin Padilla ug uban pa tungod sa alegasyon nga aduna silay kalambigitan sa pag-eskapo ni Senador Bato dela Rosa gikan sa Senate building niadtong Mayo 14.  Makalibog kini kay namahayag man sa una ang kapolisan ug NBI nga ang ilang pag-adto sa senado kabahin man sa laing katuyoan ug dili ang pagdakop ni Senador Bato.  Daw nipalig-on hinoon kini sa pagtoo nga buot pi-angan sa administrasyon ang majority bloc sa senado. Mao kana’y giingon nga, “Kon buot nimo’ng buntogon ang kaaway, libog-liboga ug pasanginli sila sa mga butang nga wala nila mabuhat.”  Fezteleern!