Justice panel: Impeach Sara may probable cause
MANILA, Philippines — Idineklara ng House Committee on Justice na may probable cause para i-impeach si Vice President Sara Duterte.
Sa botong 53 pabor at walang pagtutol sa Saballa at Cabrera complaints ay idineklara ang probable cause sa impeachment ni VP Duterte, kaya inihahanda na rin ang committee report at ang kaukulang resolusyon para sa susunod na impeachment process.
Ang boto ay ginawa matapos na hilingin ni Pinoy Workers Partylist Rep. Franz Legaspi na pagbotohan ang dalawang reklamo.
Matapos ang botohan ay hiniling naman ni ML. Partylist Rep. Leila de Lima na i-consolidate ang dalawang impeachment complaints dahil nakaangkla rin naman ito sa constitutional grounds at nagmula sa parehong serye ng alegasyon dahil ang Articles of Impeachment aniya ay dapat unified at comprehensive.
Inayunan naman ito ni House Committee on Justice Chair Atty. Gerville Luistro at inatasan ang komite na ihanda ang report at ipasa ito sa mga complainants, respondents at justice members.
Sa sandaling maisumite ang report ay itatakda ang botohan sa plenaryo sa impeachment complaint kung saan kailangan ng 1/3 vote ng lahat ng miyembro ng Kamara para ma-impeach ang Bise Presidente at madala ang kaso sa Senado para sa trial.
Si De Lima ang nag-endorsed ng Saballa et al complaint kung saan inilahad nito na mayroong pag-abuso sa paggamit ng P612.5 milyon confidential funds sa Office of the President at sa Department of Education (DepEd).
Gayundin ang alegasyon sa hindi maipaliwanag na yaman ni VP Sara at sa kanyang Statement of Assets, Liabilities and Net Worth o SALN, gayundin ang pagbabanta nito sa buhay ni Pangulong Ferdinand Marcos, First Lady Liza Marcos at dating House Speaker Martin Romualdez.
Habang si Manila Rep. Benny Abante naman na isa sa endorser ng Cabrera complaint ay nagsabing ang testimonya ng sinasabing bagman ng Bise Presidente na si Ramil Madriaga ay nasagot ang misteryo ng duffel bags na puno ng pera noong Disyembre 2022 kung saan ang P125 milyon ay dineliver sa hindi lalampas sa 24 oras at hindi 11 araw tulad ng nakasaad sa COA report.
Binanggit din ni Abante ang alegasyon ni Madriaga na sangkot si Duterte sa Philippine Offshore Gaming Operators (POGOs) at ilegal na droga, at ang pondo para sa kampanya ng Bise Presidente ay galing dito.
“Ang isang mataas na opisyal na nagpahayag ng karahasan sa halip na kapayapaan ay hindi karapat-dapat sa kanyang pwesto. Ito ay malinaw na Betrayal of Public Trust at Culpable Violation of the Constitution,” giit pa ni Abante.
Kaugnay nito, inihayag naman ng Justice panel na binigyan ng sapat na pagkakataon si VP Duterte para makadalo sa pagdinig pero hanggang sa pinal na araw na itinakda ay hindi ito sumipot.a
- Latest
