TRO hinirit ng mga abogado sa impeachment vs Sara

MANILA, Philippines — Ilang abogado pa ang naghain ng ika-apat na petisyon sa Korte Suprema (SC) na kumukwestyon sa impeachment proceedings laban kay Vice President Sara Duterte.

Sa isang 34-pahinang petisyon, ­hiniling nina Hue Jyro Go, Micah De Guzman, at Jake Leoncini sa SC na mag-isyu ng temporary restraining order (TRO) at/o isang writ of preliminary injunction upang ihinto ang pagpapatuloy ng third at fourth impeachment at ang pag-isyu ng mga subpoena.

Hinimok din nila ang korte na ipawalang-bisa at isantabi ang “finding, acts, rulings” at direktiba ng House of ­Representatives kaugnay ng mga reklamo ng impeachment, kabilang ang naging pasya na sapat ang “form and substance” at ang pag-isyu ng mga subpoena.

Maituturing anila na fishing expedition ang ginagawa sa pag-iisyu ng mga subpoena, pagtanggap ng “materials” na wala naman sa complaints, at paggamit ng third-party record-gathering para maghanap at makakuha ng mga ebidensya.

Sinabi rin nila na ang kahilingan para sa mga pahayag ng mga ari-arian, pananagutan, at net worth (SALN) na sumasaklaw sa maraming taon ay “patently overboard”.