Bail request ni journalist Cumpio, ibinasura ng korte

MANILA, Philippines — Ibinasura ng Tacloban Regional Trial Court (RTC) Branch 45 ang kahilingang makapagpiyansa ng journalist na si Frenchie Mae Cumpio at kanyang kapwa akusado na si Mariel Domequil, na una nang hinatulang guilty sa kasong terror financing noong Enero 22.

“After careful evaluation of the records and the prevailing circumstances, this court finds no strong or compelling reason to justify the grant of bail …; the joint motion to allow the accused to be admitted to bail is hereby denied,” nakasaad sa 9-pahinang desisyon ni Tacloban RTC Presiding Judge Georgina Uy Perez.

Tinukoy din ng hukuman ang posibilidad na ipagpatuloy nila ang pagkakaloob ng suporta sa terrorist activities.

“The seriousness of the offense for which the accused were convicted, raises concern regarding the potential for them to continue to provide support - whether financial, logistical or operational, to terrorist organizations, if they are released on bail.”

Bukod dito, tinukoy din sa desisyon ang posibilidad na tumakas ang mga akusado at gamitin ang kanilang koneksiyon upang makaiwas sa execution of judgement.

Sa kanilang panig, sinabi naman ni Atty. Julianne Agpalo, abogado ng mga akusado, na pinag-aaralan pa nila ang kanilang susunod na aksiyon matapos na maibasura ang kanilang petisyon.

Si Cumpio, na isang community journalist at radio broadcaster, ay ang kauna-unahang Pinay journalist na na-prosecute sa ilalim ng terror financing laws. 

Pinabulaanan naman ng mga akusado ang mga bintang laban sa kanila at iginiit na sila ay biktima lamang ng ‘red-tagging’.

Gayunman, sinabi ng hukuman na kumbinsido ito sa testimonya ng mga dating rebelde na sina Cumpio at Domequil ay nagkakaloob ng tulong gaya ng pera, armas at tela, sa teroristang grupong New People’s Army (NPA).

Matapos ang promulgasyon sa kaso noong Enero 22, ipinag-utos ng Tacloban RTC ang pag­lilipat kina Cumpio at Domequil sa Correctional Institution for Women (CIW) sa Mandaluyong City.