BuCor: Convicted sa flood control sa Sablayan Prison ikukulong
MANILA, Philippines — Ikukulong sa Sablayan Prison and Penal Farm sa Occidental Mindoro ang mga mahahatulan sa mga kasong may kaugnayan sa flood control projects, ayon sa Bureau of Corrections (BuCor).
Sinabi ni BuCor Director General Gregorio Pio Catapang nitong Huwebes, na tatanggihan sakaling hilingin na ma-accommodate sa New Bilibid Prison sa Muntinlupa City ang mga mako-convict.
Ipinaliwanag ni Catapang na ito’y dahil sa patuloy na mga operasyon bilang bahagi pa rin ng decongestion program sa NBP.
Binigyang-diin din ni Catapang na walang magiging special treatment sa “supermax” facility sa Sablayan, hindi tulad noon.
“Iyon po ang guidance talaga. Kailangan maparusahan naman talaga iyong na-involve sa flood control. Walang special treatment. Wala iyong mga passes, whatever, we want to make sure na hindi mauulit sa previous administration kasi nakakahiya naman kung hindi sila maparusahan,” ani Catapang.
Dagdag pa niya, ang BuCor ay nakakuha na ng 60 ektarya sa Palayan City, Nueva Ecija para sa isang pinag-isang penology at correction system bilang bahagi ng programang decongestion.
- Latest
