Wilma ­humina, LPA na lang

MANILA, Philippines — Humina na ang Tropical Depression Wilma na naging Low Pressure Area dulot ng northeast monsoon o amihan na nagdadala ng malamig at mainit na hangin.

Ayon sa Philippine Atmospheric Geophysical and Astronomical Services Administration (PAGASA), alas-8 ng umaga nang humina si Wilma at naging ganap na LPA.

Nitong Sabado, si Wilma ay dalawang beses na tumama sa kalupaan ng Eastern Samar, una ay sa Hilabaan Island, Dolores alas-10:50 ng gabi at sa bayan ng Oras alas-11:10 ng gabi.

Ang LPA ay namataan sa bisinidad ng ­Cataingan, Masbate dakong alas-10 ng umaga na kumikilos sa kanluran sa bilis na 15 kilometro bawat oras.

Sa 11am bulletin nito, ang LPA ay patuloy sa pagtahak sa Southern Luzon-Visayas area mula Linggo hanggang Lunes, Disyembre 8.

Hindi naman inaalis ng weather bureau ang posibilidad na mag-develop o maging tropical depression muli ang nasabing LPA sa oras na tumawid na ito sa West Philippine Sea.