Government contractors hirit idiskuwalipika sa Partylist nominees
MANILA, Philippines — Upang maiwasan ang korapsyon sa infrastructure projects, itinutulak ng Makabayan bloc na idiskuwalipika ang mga kontraktor ng gobyerno na mapabilang sa Partylist nominees.
Kasunod ito ng inihaing House Bill (HB) No. 6193 o ang Partylist System Act dahil ginagamit umano ang Partylist para makakopo ng mga infrastructure projects ng gobyerno.
Ayon sa Makabayan bloc, inihain nila ang nasabing panukalang batas sa gitna na rin ng alegasyon na isang incumbent partylist member at isang nagbitiw na dating kinatawan ng partylist ang sangkot sa maanomalyang infrastructure projects.
Alinsunod sa HB 6193, bawal ring makilahok ang mga dating Vice Mayors, Vice Governors, Governors, Kongresista, Senador, Vice President at President sa Partylist Groups bilang kanilang mga kinatawan sa Kongreso.
Saklaw din sa pagbabawal ang mga indibidwal na kapamilya at kaanak ng mga opisyal ng gobyerno hanggang ikaapat na degree; mga nagsisilbi sa posisyon ng Bureau Chief, mga dating Provincial Police Directors, AFP Battalion Commanders at iba pang matataas na posisyon sa gobyerno.
Gayundin ang mga personalidad na mas mataas pa ang suweldo kaysa mga kinatawan ng Partylist sa Kamara.
Kasama rin sa panukala na ang mga nominee ay dapat magmula sa marginalized sectors o hanay ng mahihirap.
- Latest
