‘Uwan’ 1,400 km ang lawak

‘Buong ­Luzon, Visayas masasapol'

MANILA, Philippines —  Pinaghahanda ng Office of Civil Defense (OCD) ang publiko sa posibleng pagtama ng super typhoon Uwan sa bansa na may lawak na 1,400 kilometers diameter na makakaapekto mula Batanes hanggang sa Bohol ngayong weekend.

“Ang areas of concern natin ay talagang itong Northern Luzon—Regions 1, CAR, 2, 3, 4, 5. Napakalaki ng bagyong ito. It may even reach… pwedeng umabot sa Regions 6, NIR, 7 and 8,” pahayag ni Civil Defense Deputy Administrator for Administration Bernardo Rafaelito Alejandro IV.

“We are preparing basically the entire Luzon and Visayas for the possible impact of Uwan. Napakalaki nitong bagyo, Ang radius nito ay 700 kilometers from the center—times two, 1,400 kilometers in diameter. Batanes to Bohol ang maaaring maapektuhan,” pahayag ni Alejandro.

Dahil sa inaasahang paglakas ni Uwan, ­pinayuhan ni Alejandro ang mga residente na nasa mababang lugar at mga baybaying dagat na lumikas na agad dahil maaring magdala ng malakas na ulan ang paparating na bagyo at magdulot ng mga storm surges.

“This severe weather will bring widespread impact or effect dito sa areas na dadaanan at kasama sa kanyang rainband,” sabi pa ni Alejandro.

Sinabi naman ng Department of Environment and Natural Resources – Mines and Geosciences Bureau (DENR-MGB) na nasa 8,164 barangays sa buong bansa ang susceptible sa rain-induced landslides at pagbaha.

Kabilang na rito ang 196 barangays sa Ilocos Region; 1,944 sa Cagayan Valley; 111 sa Central Luzon; 1,523 sa Calabarzon; 58 Mimaropa; at 486 Eastern Visayas.

“Ang ating mga kababayan hindi dapat basta-basta lumilipat sa kanyang tirahan, lalo sa mga nag-evacuate dahil hangga’t mayroong tayong saturation ng ground, may possibility na magkaroon ng landslide sa kanilang lugar, lalo na dapat na­ting alamin na ang landslide does not happen instantaneously o basta-basta,” pahayag ni Dr. Karlo Queaño, Chief of the Lands Geological Survey Division of the DENR-MGB.