Isyu sa ‘zero billing’ reresolbahin – Pangulong Marcos Jr.

MANILA, Philippines — Nais ni Pangulong Ferdinand Marcos Jr. na tugunan ang mga isyung bumabalot sa implementasyon ng zero balance billing system.

Sa kanyang pamamahagi ng mga ambulansya sa Ormoc City, Leyte, sinabi ni Marcos na mayroon siyang mga naririnig tungkol sa karanasan ng ilang pasyente, kabilang dito ang mahabang pila sa mga ospital.

Kaya para masuri kung totoo ang mga naririnig na balita ay personal na nagtungo sa ospital sa Tacloban ang Pangulo para testingin at personal na suriin ang implementasyon ng naturang programa.

Nais din maayos ni Pangulong Marcos ang out patient service kung saan ang pasyente matapos magpatingin at mabigyan ng reseta ay pupunta sa pharmacy at mabibigyan ng libreng gamot.

Bilang bahagi naman ng zero balance billing system, sinabi ni Marcos na ipagpapatuloy ang pag-accredit ng mga botika o pharmacy para hindi na bibili ng mga gamot ang mga pasyente.

Nauna nang sinabi ni Marcos sa kanyang State of the Nation Address (SONA) noong Hulyo 28 na sasagutin ng mga DOH hospitals ang gastusin ng mga pasyente.