Harry Roque pinadi-disbar sa SC sa ‘polvoron’ video

MANILA, Philippines — Naghain ng disbarment complaint sa Korte Suprema ang isang abogado laban kay dating presidential spokesperson Harry Roque dahil umano sa malisyosong Facebook post na nag-uugnay kay Pangulong Ferdinand Marcos Jr. sa viral na “polvoron” video.

Sa reklamong inihain ni Atty. Melvin Matibag, dating acting secretary noong 2022 ng Duterte administration, ang deepfake video kung saan pinalalabas ang paggamit ng iligal na droga ni Pang, Marcos ay nag-viral noong Hulyo na tinawag ni Roque na isang “desperate act of attention.”

“We filed this disbarment case as an officer of the court. Alam ninyo kaming mga lawyers, we are given the privilege to practice the law pero (it has) corresponding responsibilities,” ani Matibag sa panayam ng media.

“It’s been established that that’s fake news, fake evidence so tignan natin (let’s see) how the Supreme Court will appreciate it as a lawyer being the one who is posting it,” aniya pa.

Hindi na niya idinetalye ang nilalaman ng reklamo dahil sa subjudice rule o paghihigpit sa mga komento at pagsisiwalat na nauukol sa judicial proceedings.

“But the more important thing is ‘yung responsibility natin as an officer of the court as a lawyer, so dapat mataas ang standard namin so when we use social media dapat ‘yung responsibility natin nandodoon,” paliwanag niya.

Itinanggi ni Matibag na ang disbarment case ay bahagi ng umano’y harassment efforts laban kay Roque, na bumabatikos kay Pangulong Marcos at nahaharap sa contempt charges sa House of Representatives.

Maaring maglabas na ang Korte Suprema ng jurisprudence sa kung paano dapat kumilos ang mga abogado lalo na sa social media.