Alice Guo, pamilya pinaaaresto na ng Senado

MANILA, Philippines — Pinaaresto na ng Senado si Bamban,Tarlac Mayor Alice Guo at pitong iba pa na sinasabing kasabwat nito sa kanyang illegal na aktibidad.

Nilagdaan ni Senate President Francis Escudero at Senador Risa Hontiveros, chairman ng Senate­ Committee on women, children, family relations and gender equa­lity ang arrest order nitong Hulyo 11, dahil sa kabiguan ni Guo na dumalo sa imbestigasyon ng Senado kaugnay sa umano’y criminal activities sa Philippine Offshore Gaming Operators (POGO).

Bukod kay Guo, pinaaaresto rin sina Dennis Lacson Cunanan, Nancy Jimenez Gamo, gayundin ang kanyang mga magulang na sina Jian Zhong Guo at Wen Yi Lin, at mga kapatid na sina Seimen, Sheila at Wesley.

Nakasaad sa naturang arrest order ang pag-aresto at pagkulong kay Guo at kanyang mga kasama sa Office of the Sergeant at Arms hanggang dumalo sila at humarap sa komite.

“The Sergeant-At-Arms is hereby directed to carry out and implement this Order and make a return hereof within twenty-four (24) hours from its enforcement,” nakasaad sa kautusan.

Bunsod ito ng hindi pagdalo nina Guo sa mga ginawang hearing noong Hunyo 26 at Hulyo 10.

Matatandaan na pina-cite in contempt ni Hontiveros sila Guo noong Hulyo 10 dahil sa magkahiwalay na mosyon nina Se­nate President Pro Tempore Jinggoy Estrada at Sen. Sherwin Gatchalian.

Si Guo ay inakusahan ng pag-antala, humahadlang at hinaharang ang pagdinig ng Senado kaugnay sa illegal na operasyon ng POGO.

Matatandaan na lumiham sa Senado ang alkalde at sinabing hindi siya “physically and mentally fit” para dumalo sa pagdinig noong Hulyo 10 na hindi naman tinanggap na dahilan ng mga senador.