Higit 1K tauhan ikakalat ng MMDA sa SONA

MANILA, Philippines — Magtatalaga ang Metropolitan Manila Development Authority (MMDA) ng mahigit isang libong tauhan na siyang mag-aayos sa daloy ng trapiko sa ikatlong State of the Nation Address (SONA) ni Pangulong Ferdinand Marcos Jr. Sa Hulyo 22 sa Batasang Pambansa, Quezon City.

Sa pahayag ng Presidential Communications Office (PCO), ang MMDA ang mangangasiwa sa daloy ng trapiko, gayundin sa mga pedestrians at magsisilbing emergency respondents sa SONA.

Ayon naman kay MMDA Traffic Operations Officer Manny Miro, magsasagawa rin ang MMDA personnel ng road at sidewalk clearing at magmomonitor ng traffic sa mga highway patungo sa Batasan.

Nauna nang ipinag-utos ni Pangulong Marcos sa Kamara na i-accommodate lahat ng nais na dumalo sa SONA.

Bilang pag-iingat naman ay nag-locked down na ang Batasang Pambansa simula nitong Biyernes, Hulyo 19 bago ang  SONA na araw ng Lunes.

Nilinaw naman ni Miro na sa ngayon ay wala pang isasaradong mga daan.

Mag-aanunsiyo aniya ang MMDA sa mga kalsadang isasara bago ang SONA.