Kamara ipinahuhuli gumagamit ng ‘8’ plate
MANILA, Philippines — Ipinahuhuli ng Kamara sa Land Transportation Office (LTO) at Metro Manila Development Authority (MMDA) ang sinumang indibidwal na gagamit ng number “8” plate at ipinakukumpiska rin ang mga plaka ng mga ito.
Ito ang inihayag ni House Secretary General Reginal “Reggie” Velasco na nilinaw na hindi inawtorisa ng Kamara sa ilalim ng liderato ni Speaker Ferdinand Martin Romualdez ang paggamit ng official plate sa mga behikulo na para lamang sa mga miyembro ng Kamara sa kasalukuyang 19th Congress.
Ang number “8” plate ay ginagamit bilang protocol plate para sa mga miyembro ng Kamara kung saan ang Presidente ay number “1”, Bise Presidente “2”, Senate President “3”, House Speaker “4”, Chief Justice “5”, Cabinet Secretaries “6” at Senator “7”.
Ipinakukumpiska rin ni Velasco sa LTO at MMDA ang paggamit ng mga expired na plaka at maging ang mga kahina-hinalang plaka.
“These plates hold no official sanction from the House and are not to be considered legitimate,” saad ni Velasco.
Binigyang diin ni Velasco na may kasalukuyang kasunduan ang Kamara sa Metropolitan Manila Development Authority kung saan sinumang driver na mahuhuling gumagamit nito ay mananagot at kukumpiskahin din ang naturang mga plaka.
- Latest
