Public schools, pinaalalahanan sa ‘no collection policy’
MANILA, Philippines — Pinaalalahanan kahapon ng Department of Education (DepEd) ang mga pampublikong paaralan hinggil sa kanilang ‘no collection policy’.
Ang paalala ay ginawa ng DepEd matapos na ungkatin ng Senado ang mga reklamong natatanggap nila hinggil sa pangongolekta ng kontribusyon ng mga public schools, sa pamamagitan ng Parent-Teacher Association (PTA), sa budget hearing noong Huwebes.
Sinabi ni DepEd Spokesman at Undersecretary Michael Poa na mahigpit nilang ipinagbabawal ang pagso-solicit para sa school supplies at mga appliances para sa mga estudyante.
“Mayroon tayong tinatawag na no collection policy, so hindi po talaga puwedeng mangolekta ang ating mga paaralan,” ani Poa.
Hinikayat din niya ang publiko na kaagad na magreklamo sa kanilang tanggapan kung may nagaganap na paglabag dito.
Dagdag pa ni Poa, “Ang point ng no collection policy ay hindi dapat nakakaapekto sa grades o kung anumang performance ng bata ‘pag hindi siya nakapagbigay.”
- Latest