Paglilinis ni Isko sa Maynila pinuri ng port users group
MANILA, Philippines — Pinuri ng Port Users Confederation of the Philippines (PUCP) ang pagsisikap ni Manila Mayor Francisco “Isko” Domagoso na maipalinis ang mga lansangan sa lungsod kabilang na ang nasa Port of Manila at sa Manila International Container Port na dalawang pangunahing daungan na namamahala sa mga import at export sa bansa.
Sinabi ni PUCP President Rodolfo T. De Ocampo na ang pagpupunyagi ng alkalde na malinis ang bahagi ng Radial Road 10 (R-10) mula sa mga informal settlers at iba pang lansangan na patungo sa mga ports ay malaking tulong sa mga motorista, partikular na sa mga cargo vehicles na magtutungo at magmumula sa port area patungo sa North Luzon Expressway.
Sinabi naman ni PUCP Chairman Atty. Oscar Sevilla na positibo ang naging tugon ng kanilang mga miyembro sa seryosong kampanya ng alkalde na masolusyunan ang traffic congestion sa Maynila.
Aktibong isinusulong ng PUCP, na binubuo ng 16 industry associations, ang proteksiyon at promosyon ng interes ng mga port users, partikular na ang mga miyembro nito na mga exporters, importers, bonded warehouse operators, customs brokers, truckers, door to door consolidators, personeros, arrastre operators, freight forwarders at iba pa.
Sa paunang pagtaya, natukoy na nalulugi ang bansa ng P3.5 bilyon araw-araw dahil sa sitwasyon sa malalang trapiko sa bansa, at ang malaking bahagi ng naturang business opportunities losses ay nagaganap sa dalawang pantalan sa Maynila.
Matatandaang sa unang 100 araw pa lang sa pwesto ni Domagoso ay naging agresibo na ito sa clearing at clean-up drive upang mapaluwag ang daloy ng trapiko sa may 3,373 lansangan sa buong lungsod.
Isinagawa rin ng alkalde ang kanyang monumental clearing at clean-up operation sa Divisoria at Carriedo.
- Latest
