China: US walang kinalaman sa agawan sa teritoryo

MANILA, Philippines – Binalewala ng China ang paghahayag ng suporta ng Amerika sa inihaing reklamo ng Pilipinas sa United Nations tribunal upang maresolba ang agawan ng katubigan sa West Philippine Sea.

Sinabi ni Chinese foreign minister Hong Lei na walang kinalaman ang Estados Unidos sa agawan ng Pilipinas at China.

"The US is not a party concerned in the South China Sea disputes," wika ni Hong sa isang pulong balitaan kahapon.

Nagpahayag ng suporta si US State Department deputy spokesperson Marie Harf kahapon matapos maghain ng written pleadings ang Department of Foreign Affairs (DFA) sa International Tribunal on the Law of the Sea (ITLOS).

"The United States reaffirms its support for the exercise of peaceful means to resolve maritime disputes without fear of any form of retaliation, including intimidation or coercion," pahayag ni Harf.

Sa kabila nito ay naniniwala ang si Hong na walang papanigan ang Amerika sa agawan ng dalawang bansa.

"It has on many occasions stated that it takes no position on issues concerning territorial sovereignty," sabi ni Hong.

Muling tumaas ang tension sa pagitan ng Pilipinas at China matapos harangin ng Chinese coast guard ang barko ng Pilipinas na magdadala ng supply sa Ayungin Shoal.