Dacer-Corbito hearing itinakda sa Nob. 16

MANILA, Philippines - Itinakda na ng Manila Regional Trial Court sa Nobyembre 16 ang pagdinig sa Dacer-Corbito double murder case.

Ayon kay Atty. Napoleon Poblador, abogado ni dating Police Senior Supt. Michael Ray Aquino, mula sa nasabing petsa ay ita­takda na ang pagdinig ng kaso tuwing Miyerkules sa sala ni Judge Thelma Bunyi-Medina.

Samantala, sa isinagawang pre-trial sa kaso ni Aquino, pumayag ang hukom na iharap muli ng prosekusyon ang kanilang mga testigo na iniharap bago pa man ang arraignment.

Kabilang dito sina Dra. Rachel Fortun, isang forensic expert, dating police colonel Cesar Mancao, Glenn Dumlao at iba pa.

Ipinasusumite rin ng depensa ang mga physical at documentary evidences na nauna nang inilabas ng prosekusyon katulad ng mga affidavit, certificate gayundin ang cell-phone at sim card ni Dumlao.