MANILA, Philippines - Upang mas mapalakas pa ang pag-uugnayan at pagpapalitan ng mga impormasyon partikular sa paghabol sa masasamang elemento at paglaban sa global terrorism, nakatakdang magbigay ang Federal Bureau of Investigation (FBI) sa National Bureau of Investigation (NBI) ng automated fingerprint identification system (AFIS) machines.
Aminado si NBI Director Magtanggol Gatdula na kulang sa badyet ang NBI kaya hindi kayang bumili ng equipments o ang AFIS machines na itinuturing na pinakamalakaing biometric data base sa mundo.
Hindi man alam ang halaga ng nasabing machine, ikinumpara na lamang ito ni Gatdula sa SSS biometric machines na nagkakahalaga na umano ng P1 bilyon.
Batay sa FBI website, ang AFIS ay nagsisilbing national fingerprint at criminal history system na maasahan sa loob ng 24 oras, 365 na araw para tumulong sa pagresolba ng mga krimen at bago pa maganap ang krimen at gamit din sa pagdakip ng mga kriminal at mga terorista. Makukuha din sa AFIS ang criminal histories o record, mug shots, peklat at tattoo photos, height, weight, kulay ng buhok, mata maging ang mga ginamit na alyas.
Magagamit umano ang AFIS sa NBI clearance, kung saan nasa 12 milyon ang kumukuha nito taun-taon.
Sa kasalukuyan, may 39 milyong ‘unclassified fingerprint cards’ ang nakaimbak sa NBI na dapat maisalang sa AFIS.