2 nasawing piloto ng Air Force ililibing ngayon

MANILA, Philippines - Bibigyan ng full military honor ng Armed Forces of the Philippines (AFP) sa paghahatid sa huling hantungan sa Libingan ng mga Bayani ngayon araw na ito ang dalawang piloto ng Airforce na kapwa nasawi sa isang plane crash sa Bataan noong nakalipas na araw ng Huwebes.

Alas-10 ng umaga nakatakdang ilibing sina Maj. Ephraim Gatus Suyom, 37, pilot instructor,  top notcher at class valedictorian ng PMA class 1997 “Kalasag ng Lahi” at co-pilot nitong si Capt. Reymond de Leon.

Pagkakalooban din ng 21-gun salute at parade of honor ang dalawa.

Ang dalawa ay kapwa nasawi makaraang bumagsak ang sinasakyan nilang S-211 trainer jet, sa Banawang Village, Bagac, Bataan malapit sa Stela Mariz Beach Resort habang nagsasagawa ng “routine proficiency flight”.

Sa loob ng limang gabing lamay ay ibat-ibang mataas na opisyal ng pamahalaan, mga kasama sa Airforce, AFP at lokal government units ang dumalaw sa burol para makiramay sa pamilya ng dalawang nasawing piloto.

Si AFP chief of staff Lt. Gen. Eduardo Oban Jr., ay personal din nakiramay sa pamilya ni Ephraim at de Leon noong Sabado ng gabi at nagpahayag ng labis na pagkalungkot at panghihinayang sa maagang pagkamatay ng dalawang magaling, masipag at matalino nilang piloto.