MANILA, Philippines - Bagaman at hindi pinangalanan, halatang si Senator Ferdinand “Bongbong” Marcos ang pinatatamaan kahapon ni Pangulong Aquino kahapon nang sabihin nito na malamang natulad sa Libya ang Pilipinas kung hindi nangyari ang EDSA People Power I kung saan napalayas sa kapangyarihan si dating Pangulong Ferdinand Marcos.
“I do not think we could have become a Singapore had we stay the course with Marcos... We were far from becoming a Singapore. Were it not for EDSA we probably could have become another Libya,” sabi ng Pangulo.
Matatandaan na sinabi ni Sen. Marcos na hindi naman kusang bumaba sa puwesto ang kaniyang ama dahil mistulang kinidnap sila at kung nagpatuloy umano ang panunungkulan ng kaniyang ama ay posibleng naging kasing unlad ng Singapore ang Pilipinas.
Nilinaw naman ng Pangulo na obligasyon niyang ituwid ang nararapat at hindi niya gustong ungkatin ang sugat ng nakaraan. Ipinagmalaki ng Pangulo na isa sa mga natamasa ng mamamayan sa nangyaring People Power I ay ang malayang pamamahayag at ang pagrespeto ng ibang bansa sa Pilipinas.
Ginawa ni Aquino ang patama kay Marcos sa EDSA People Power awards sa Malacañang kahapon.