Hari ng Belgium pinasalamatan ng Rizal, Laguna residents

MANILA, Philippines - Pinasalamatan ng 15 kinatawan ng mga organi­sasyong sumusuporta sa Laguna Lake Rehabilitation Project si Haring Albert II ng Belguim dahil sa pagsuporta sa proyekto na pakikinabang ng milyon-milyong residente na naninirahan sa paligid ng pinakamalaking lawa sa bansa.

Ayon kay Gil Navarro, tagapagsalita ng Kilusang Lawa Kalikasan (KLK), lumiham sila sa hari sa pamamagitan ng Belgian embassy upang ihayag ang kanilang pasasalamat sa masugid na interes ng kaharian sa development project sa Pilipinas.

Ang nasabing liham ay nilagdaan umano ng 650 opisyal ng 30 organisasyon sa Laguna at Rizal na kumakatawan sa mahigit sa 35,000 katao kung saan nakasaad na sila ay nagpapasalamat sa tulong na ibinibigay ni Haring Albert II upang maipatupad ang proyekto sa 94,000 ektaryang lawa.

Kasabay nito nananawagan din ang grupo kay Haring Albert II na umpisahan na sa madaling panahon ang nabinbing rehabilitasyon ng Lawa ng Laguna.