Laguna de Bay rehab pinaboran ng DOJ

MANILA, Philippines - Hindi maaaring ituring ang Laguna de Bay Rehabilitation Project bilang isang midnight deal dahil sa sakop ito ng Overseas Development Assistance (ODA) mula sa pama­halaan ng Belgium.

Dahil dito, ang proyekto ay hindi sakop ng Government Procurement Act, batay sa Opinion No. 38, Series 2010 na nilagdaan ni Justice Secretary Leila M. de Lima noong Agosto 18.

Inisyu ni De Lima ang 14-pahinang opinion base sa hiling ni Environment Secretary Ramon Paje sa DOJ upang madetermina kung ang supply contract sa pagitan ng DENR at ng kumpanyang Belgian na Baggerwerken Decloedt En Zoon (BDC) ay valid at nararapat na pagkalooban ng Notice to Proceed (NTP).

Ang opinion, na na­kuha dalawang linggo ma­tapos itong lagdaan, ay nagpatibay sa DoJ Opi­nions No. 26 na inisyu noong Hunyo 13 at No. 30 na may petsang Hunyo 23, na kapwa inisyu ni Acting Secretary Alberto Agra.

Bukod dito, ang mga nasabing opinion ay nag­sasaad na “direct award of the Contract to Bagger­werken Deloedt En Zoon N.V, is supported by law as the procurement of infrastructure projects funded by ODA is excluded from public bidding.”