8 lalawigan 'hotspots'

MANILA, Philippines - Walo pang lalawigan ang tinukoy ng Philippine National Police (PNP) na kabilang sa mga election watchlist o hotspot na ma­susing babantayan ng mga awtoridad kaugnay ng halalan sa Mayo 10.

Tinukoy ni PNP Chief Di­rector General Jesus Verzosa ang mga lalawi­gan ng Quezon, Masbate, Iloilo, tatlong lalawigan sa Samar, Surigao at Davao.

Ayon kay Verzosa, sa kabuuang 500 election watchlist, 18 hanggang 17 lalawigan ang naklasipi­kang mga Areas of Immediate Concern tulad ng Maguindanao, Lanao del Sur, Sulu, Basilan, Nueva Ecija , Abra atbp.

Sa tala ng PNP, uma­abot sa 211.11 % ang ibi­naba ng mga Election Related Violent Incidents (ERVI) sa pag­sisimula ng election period kumpara noong 2007 national elections at 186.67 % naman itong mababa noong 2004 national elections.

Umaabot naman sa 71 ERVIs ang naitala ng PNP simula noong Enero 10 ng mag-umpisa ang election period kung saan 33 indi­bidwal ang nasawi, 31 ang nasugatan habang 45 ang nakaligtas sa insidente.

Kaugnay nito, sinabi ni Verzosa na posibleng tu­maas pa ang mga insi­dente ng ERVI lalo na sa local level habang palapit na ang halalan.