CHR tutok sa 'Maguindanao'

MANILA, Philippines - Tiniyak ng Commission on Human Rights (CHR) na iginagalang ang karapatang-pantao ng mga suspects sa “Maguin­danao Massacre” na nakakulong habang inihahanda ang kaso laban sa mga ito.

Ayon kay CHR Chairperson Leila De Lima, nagsa­sagawa na sila ngayon ng independent inquiry sa ma­saker upang mapabilis ang pagbibigay ng hus­tisya sa mga biktima nito at maparusahan ang res­ponsable dito.

Gayunman, kinakailangan pa rin aniya na mapro­teksiyunan ang karapatang pantao ng mga suspects dito lalo na at nakatanggap ang CHR ng ulat na ilan sa mga ito ay nakakulong na gayung wala pang pormal na kasong isinasampa gaya ni Autonomous Region in Muslim Mindanao (ARMM) Governor Zaldy Ampatuan na ngayon ay nakakulong sa Gen. Santos City makaraang arestuhin nang ipataw ni Pangulong Arroyo ang martial law sa Maguindanao.

Sa ngayon ay wala pa rin aniyang testigo na tumu­tukoy na kabilang ang gobernador sa nagplano ng massacre at bumaril sa mga biktima.

Una na din sinabi ni Justice Secretary Agnes Deva­nadera na nasa Mala­cañang si Zaldy Ampatuan noong maganap ang mass killing. Bunsod nito, iginiit ni De Lima na dapat na maging parehas ang batas at kilalanin din ang karapatan ng mga suspects dito.

Inihayag pa ni De Lima na nagmo-monitor ang independent teams ng CHR sa mga ginagawang pagdinig sa kaso laban kay Datu Unsay Mayor Andal Ampatuan, Jr. sa Quezon City gayundin sa pagkakapigil kina Zaldy at kanyang amang si Andal Sr. (Mer Layson)