2 Pinoy sa UAE kalaboso sa pag-inom ng alak

MANILA, Philippines – Binalaan ng Department of Foreign Affairs (DFA) ang mga OFWs sa United Arab Emirates (UAE) laban sa labis na pag-inom ng alak upang makaiwas na masangkot sa gulo at mawalan ng trabaho.

Ang babala ay kasunod ng ulat na dalawang mang­ gagawang Pinoy ang hina­tulang mabilanggo ng dala­wang buwan dahil sa pag-inom ng alak.

Nabatid na ang pag-inom ng alak ang karani­wang nagiging dahilan kung bakit inaaresto at nakukulong ang mga Pinoy sa Middle East.

Ayon kay Philippine Consul General Benito Valeriano, ang dalawang Pinoy na di pinangalanan ay nahuling nag-iinuman sa labas ng kanilang tinutu­luyan sa Sharjah, UAE.

Aniya, bagamat batid niyang nagkakatuwaan lamang ang mga ito sa pag-inom ng alak, hindi pa rin nila ito dapat gawin dahil ito’y ipinagbabawal sa UAE, at itinuturing na isang krimen.

Maliban kasi aniya sa pagkaaresto at pagkaka­detine, maaari ring mawa­lan ng trabaho ang dayu­hang mahuhuling umiinom ng alak, dahil maaari itong kaagad na ipa-deport ma­tapos na mapagsilbihan ang kanyang sentensiya. (Mer Layson)