Magkasunod na sunog sa NAIA 1, Mla. Domestic Airport: 1 sugatan

MANILA, Philippines - Kasabay ng matin­ding laban nina Pam­bansang Kamao Manny “Pacman” Pacquiao at Ricky “Hitman” Hatton sa Las Vegas, Nevada, dalawang magka­sunod na sunog ang dumale sa loob ng Ninoy Aquino International Airport at Manila Domestic Airport terminal sanhi ng pagka­sugat ng isang kawani kahapon.

Base sa report ng Manila International Airport Authority, unang su­miklab ang apoy sa Victoria Air Hangar sa Manila Domestic Airport na ngayon ay gina­gamit na imbakan ng iba’t ibang spare parts ng eroplano.

Ayon kay Fred Vas­quez, action officer on duty sa NAIA Command Cen­ter na nagsimulang sumik­lab ang apoy sa hangar na nagmula sa isang make-shift stove sa hangar.

Nabatid ng isang Rolando de Vera ang nagsasaing  nang tu­maas ang apoy dahil sa pag­gamit nito ng isang bote ng ”high octane airplane gasoline.”

Habang inaantay na maluto ang kanin nang aksidente umanong ma­ta­big ng isang dumaang pusa ang bote na kinala­lagyan ng gasolina na ginagamit sa eroplano kaya nasunog ang pusa.

Maging si de Vera ay napaso ng umaapoy na gasolina sa kanyang kanang kamay.

Nagpagulung-gulong naman ang nasusunog na pusa sa kisame hang­gang sa mamatay sanhi upang kumalat ang apoy.

Agad na rumesponde ang MIAA firefighters team sa hangar at napi­gilan ang pagkalat ng apoy sa bubong dakong alas-11 ng umaga ha­bang agad na dinala sa Manila Domestic clinic si de Vera na nag­tamo ng minor burn.

Samantala, faulty electrical wiring ang sinasabing dahilan ng kasunod na sunog sa Cora Jacob’s boutique sa ikalawang pa­lapag ng NAIA Terminal 1.

Sinabi ng mga em­pleyado ng botique na natunaw ang kanilang dimmer switch bunga ng short circuit na maaaring maging dahilan ng mala­king sunog sa buong paliparan.

Mabilis na inapula ang apoy ng mga aler­tong empleyado gamit ang nakalagay na fire extinguisher sa loob ng botique dakong alas-12:10 ng hapon.

Wala namang iniulat na nasugatan sa ika­lawang insidente ng sunog sa pali­paran. (Ellen Fernando)