Freeze order sa bank accounts ni Resado pinalawig ng Court of Appeals
MANILA, Philippines – Pinalawig pa ng Court of Appeals (CA) ang freeze order laban sa bank accounts ni State Prosecutor John Resado na nadawit sa kontrobersiyal na kaso ng suhulan ng Alabang Boys.
Sa resolusyon na isinulat ni Associate Justice Myrna Dimaranan-Vidal kinatigan nito ang mosyon ng Anti-Money Laundering Council (AMLC) na humiling ma-extend ang freeze order hanggang June 16.
Nabatid na napaso noong Abril 17 ang unang freeze order.
Nilinaw naman ng CA na ang kanilang ibinigay na extension ay huli na kung kayat kailangan matapos na nito ang kanilang imbestigasyon bago ang deadline na Hunyo 16.
Ang AMLC ay nagsasagawa ng imbestigasyon sa bank accounts ng mag-asawang Resado sa Banco de Oro-SM Bacoor branch sa Cavite at PSBank sa Padre Faura, Manila dahil na rin sa nagkaroon ito ng deposito na P800,000 noong Dec. 2, 2008 na siya ring araw na naibasura ang kaso laban sa Alabang boys. (Ludy Bermudo)
- Latest
- Trending
