Stimulus para sa beterano: Proseso minamadali; lobbyist buking

Inatasan kahapon ni Pangulong Gloria Ma­ca­pagal-Arroyo ang Philippine Veterans Affairs Office na madaliin ang proseso ng pag­kuha ng mga benepisyo ng mga Filipino veterans.

Ginawa ng Pangulo ang utos sa kanyang mensahe sa simpleng seremonya sa Mala­cañang kaugnay ng ipi­nasang stimulus package ni United States Pre­sident Barack Oba­ma kung saan ay naka­pa­loob ang lump sum benefits para sa Pinoy veterans. Dapat anyang magtayo ng mga fast track centers ang PVAO sa mga lalawigan.

Layunin nito na hindi ma­hirapan at hindi ma­gas­­tusan ang mga Pi­noy veterans sa pagbi­yahe patungong May­nila upang iproseso ang kanilang claims.

May ilang Pinoy veterans na dumalo sa pag­diriwang sa Mala­cañang kahapon ang naka-wheel chair at ang iba naman ay mga naka-tungkod dahil na rin sa katandaan.

Ibinunyag din kaha­pon ng Malacañang na mayroong mga nagsa­sa­mantalang grupo sa mga Pinoy veterans na nag­papakilalang lobbyists para mapadali ang kani­lang claim sa kani­lang lump sum benefits mula sa US.

Sinabi ni Deputy Presidential Spokesperson Lorelei Fajardo na personal na nakarating sa kanya ang ulat mis­mo sa mga local government units at sa regional office ng PVAO.

Idiniin ni Fajardo na libre at walang gastos ang nasabing proseso gaya ng paliwanag ni US Ambassador Kristie Kenney.

Batay sa US stimulus package, ang mga Pi­noy veterans na naka-base sa US ay tatang­gap ng $15,000 habang ang mga Pinoy veterans na nasa Pilipinas ay ta­tanggap naman ng $9,000 bilang lump sum benefits. (Rudy Andal)