P2.50 bawas pasahe sa jeep hinirit

Nagsampa ng petis­yon sa Land Transportation Franchising Regulatory Board (LTFRB) para sa fare rollback ang isang commuter protection group dahil sa patuloy na pagbaba ng halaga ng petroleum products.

Ayon kay Elvira Me­dina, pangulo ng National Council for Commuter Protection Inc, hinihiling nila sa LTFRB ang pag-rollback sa minimum na pasahe sa jeep na P6.00 o bawas na P2.50 sa kasalukuyang minimum na pasahe na P8.50 dahil patuloy naman ang pag­rollback sa halaga ng petroleum products sa bansa tulad ng gasolina at krudo.

Sinabi ni Medina na ka­nilang nadiskubre na humihiling ng napaka­ taas na singil sa pasahe ang mga pampasahe­rong sa­sakyan noong may serye ng oil price hike dahil ginagamit ni­lang basehan ang na­pakataas na fuel price projection.

Sinisi din nito ang mga driver na nagsasabing so­brang malaki ang kani­lang gastusin sa krudo o gasolina sa kanilang sa­sakyan dahil sa mataas na halaga ng petroleum products pero sa katu­nayan, matakaw kumain ng krudo o gasolina ang kanilang sasakyan dahil sa luma nilang makina.

Bagamat hati pa ang reaksiyon ng publiko sa usapin ng fare rollback umaasa naman ang na­turang grupo na mapa­pag­bigyan ng LTFRB ang kanilang petisyon.

Sa panig naman ng transport group gaya ng Pasang-Masda at United Transport Alliance Koalis­yon (1-UTAK), papayag sila sa fare rollback kung aabutin na sa P44 ang halaga ng diesel kada litro. (Angie dela Cruz)