Dawit sa human smuggling, Immig officer sinibak!

Sinibak kahapon ni Immigration Commissioner Marcelino Libanan ang isang babaeng immigration officer na nakatalaga sa Ninoy Aquino International Airport (NAIA) da­hilan sa umano’y pagka­kasangkot sa tangkang pag­papaalis sa 17 kaba­baihan na pawang menor-de-edad patu­ngong Hong­kong at Middle East.

Nagpalabas si Libanan ng “order” para sa pagsi­bak sa pwesto kay immigration officer Mindaya Ombawa.

Mananatili muna si Ombawa sa BI main office sa Intramuros, habang nagpapatuloy ang imbes­tigasyon sa kanya.

Maliban dito, inatasan na rin ni Libanan si NAIA-BI head supervisor Ferdi­nand Sampol na magsa­gawa ng agarang imbesti­gasyon sa kaso kasabay sa pagsasabing hindi siya mangingiming suspindihin o tuluyang sibakin si Ombawa sa sandaling mapatunayang guilty ito sa nasabing kaso.

Siniguro naman ni Liba­nan na mapagka­kalooban ng “due process” si Ombawa at bibig­yang pagkakataon na idepensa ang sarili sa pamamagitan ng pagkuha ng abogadong magta­ tang­­gol sa kanya.

Batay sa ulat, ang 17 pasahero ay naharang ng mga tauhan ng National Bureau of Investigation sa NAIA 3 terminal habang papasakay sa Cebu Pacific Airlines flight patu­ngong Hongkong at Middle East.

Ang mga menor de edad ay mula sa Maguin­danao at Cotabato sa Min­danao kung saan nadis­kubreng tampered ang mga pasaporte ng mga ito.

Si Ombawa, na naka­talaga sa old NAIA terminal ang umano ay nag-utos sa mga pasahero na mag check-in sa airline counters at magtungo sa kaniya sa BI counter para sa departure clearances.

Bukod dito nadiskubre din na sa sasakyan ni Ombawa nagtatago ang mga illegal recuiter na sina alyas Teng at Toni. (Gem­ma Amargo-Garcia/Ellen Fernando)