MOA di dapat ikabahala

Hindi pa isang batas ang Memorandum of  Agreement (MOA) sa pa­gitan ng Government of the Republic of the Philippines (GRP) at Moro Islamic Liberation Front (MILF) at hindi rin isang kontrata na kaila­ngan nang ipatupad kaya wa­lang dapat ikabahala.

Ito ang ginawang pag­lilinaw ni Misamis Occidental Gov. Leo Ocampos sa pangamba ng ilan tungkol sa kontrobersiyal na GRP-MILF MOA.

Ipinaliwanag ni Ocam­pos, national president ng League of Provinces of the Philippines, ang MOA ay isa lamang kapirasong papael na kailangan pang aprubahan ng Kongreso at ng pagbabago sa Kons­titusyon para maipa­tupad. 

“A public debate is also a healthy avenue for better understanding of the MOA,” sabi ni Ocam­pos.

Nanawagan din si Ocam­pos sa GRP at MILF na ilantad sa pub­liko ang mga nakapaloob sa MOA dahil naniniwala ito na maraming good points dito gaya ng economic gains kaysa puli­tika.

Sinabi naman ni La­nao del Norte Congressman Bobby Dimaporo na wa­lang dapat ipangamba sa kontrobersyal na MOA dahil ang layunin nito ay makamit ang kapayapaan sa Minda­nao.

“Isa lamang adyenda sa negosasyong pang­kapaya­paan ang MOA na inaasa­hang maisasa­katuparan sa loob ng 12 buwan. Kaya nga nan­dyan ang lahat ng gusto ng MILF dahil ito ang punto ng usapan,” sabi ni Di­maporo sa isang pana­yam.

Bukod dito, ayon pa sa kanya, kailangan mu­nang dumaan sa plebisito ang MOA dahil ito ang naka­saad sa batas ng Autonomous Region for Muslim Minda­nao. (Butch Quejada)