Fishing ban sa Romblon lang - DOH

Nagsanib-puwersa na kahapon ang Department of Health, Bureau of  Fisheries and Aquatic Resources (BFAR) at World Health Organization (WHO) upang pa­yapain ang publiko laban sa fish scare at ma­numbalik ang tiwala sa pagkain ng isda at iba pang pagkaing dagat.

Sinabi kahapon ni Health Secretary Francisco Duque III na ligtas na kainin ang isda basta’t hindi ito nagmula sa Romblon dahil nananatili pa rin ang temporary ban sa panghuhuli at pagkain ng isda na mag­ mumula sa karagatang sakop ng Romblon bunga ng po­sibleng toxic na maku­kuha sa kemikal na karga ng M/V Princess of the Stars at mga bulok na katawan ng pasahero.

Ani Duque, karamihan ng seafoods sa merkado ay galing sa Palawan at hindi sa Romblon kaya walang dapat na ipa­ngamba ang publiko.

Hindi naman umano titigil ang mga awtoridad sa pagmomonitor kada ika-12 oras na pagkuha ng water samples sa karagatan ng Romblon upang makatiyak sa kon­disyon ng dagat lalo’t mayposibilidad na ma­kontamina ito ng endosulfan pesticide. Sa kasa­lukuyan ay negatibo pa rin ito sa kontami­nas­yon.

Sa panig ng BFAR, sinabi ni Gil Adora na walang dapat ipag-alala ang publiko sa mga ibi­nebentang isda sa pa­lengke dahil tiyak na wa­lang nanggaling sa Rom­blon dahil naka-quaratine na ang mga lugar dito at im­posible na makapa­ngisda pa roon, simula noong Biyernes.

Bukod pa rito, ang mga isda ay tinatawag na resident fish ng lugar na hindi naman lumalayo pa ng kanilang pinagla­la­ngu­yan at hindi na mapa­padpad sa ibang teri­toryo. (Ludy Bermudo)