Dalawa pang Pinay ang nahaharap ngayon sa kasong drug trafficking sa Hong Kong.
Kinilala ng Department of Foreign Affairs (DFA) ang dalawa na sina Vilma Tambogon, 35, may-asawa, tubong Pangasinan at Michelle Gabriel, 27, dalaga, ng Baguio City.
Si Tambogon ay naaresto umano sa Chek Lap Kok Airport noong Marso 26 matapos makumpiska sa bagahe nito ang 3.1kg ng heroin na pawang nakalagay sa secret compartment ng kanyang maleta.
Si Gabriel naman ay naaresto rin sa Hong Kong Airport noong Marso 30 at nakuha sa pag-iingat nito ang 5.5kg ng heroin sa kanyang mga dalang gamit.
Ang dalawang Pinay ay nakatakdang humarap sa pagdinig ng kanilang mga kaso sa susunod na linggo.
Kaugnay nito, pina yuhan ng DFA ang mga OFW sa HK na mag-ingat sa mga ipinapadalang bagahe sa mga ito na karaniwan na umanong sinisingitan ng droga.
Sa tala ng DFA, maraming OFWs ang napahamak bunga ng ipinakisuyong bagahe sa kanila. (Joy Cantos)