Teodoro bababa kung iuutos ng Pangulo

Handang bumaba sa kanyang puwesto si Defense Secretary Gilberto Teodoro Jr., kung kina­ka­ilangan at kung ipag-uutos ito ni Pangulong Arroyo.

Ang reaksyon ay gi­nawa ni Sec. Teodoro bilang tugon sa balita na papalitan siya sa puwesto ni outgoing Chief of Staff Gen. Hermogenes Espe­ron Jr. na magtatapos ang ekstensyon ng ter­mino sa darating na Mayo 9.

“Kami ay nakahanda anytime kailangan ka­ming bumitaw or kung  kina­ka­ila­ngan na ibang tao ang sa tingin ng ating Pangulo na pumalit sa atin,” ani Teodoro.

Sinabi ni Teodoro na bahagi ng tungkulin ng mga gabinete ng admi­nis­trasyon na sundin ang anumang desisyon at ipag-uutos ng punong ehekutibo kung nais nito na magpa­tupad ng revamp sa hanay ng mga opisyal ng gobyerno. 

Si Teodoro ay sinasa­bing mapupunta sa De­partment of Justice (DOJ) kapalit ni Secretary Raul Gonzalez. 

Gayunman ang bagay na ito ay wala pang kum­pirmasyon buhat sa Palasyo.

Nauna nang sinabi ni Press Secretary Ignacio Bunye na wala pa sa plano ng Malacañang ang mag­pa­tupad ng revamp sa mga gabinete nito.

Sa kasalukuyan, ayon kay Teodoro ay naka­pokus ang kaniyang aten­syon na mapagbuti pa ang kani­yang trabaho.

Magugunita na nitong nakalipas na linggo ay ini­hayag ni Esperon na ika­rarangal niya kung iaalok sa kaniya ng Pa­ngulo ang posisyon bilang Defense Secretary. (Joy Cantos)