Posters ni Faeldon ikinalat, warrant of arrest inilabas

Nagpalabas na kaha­pon ng warrant of arrest si Judge Oscar Pimentel ng Branch 148 ng Makati Regional Trial Court (MRTC) laban sa pumugang mi­yem­bro ng Magdalo na si Marine Capt. Nicanor Faeldon. 

At upang matiyak na hindi na makapagtatago sa batas, ipinakalat na rin ka­hapon ng Philippine National Police (PNP) ang pos­ters ni Faeldon at anim na iba pang kasapi ng Mag­dalo na tumakas sa Manila Peninsula siege sa Makati City noong Nob­yem­bre 29.

Dahil sa warrant of arrest laban kay Faeldon ay itinuturing na ito ngayon ng awtoridad na isang “wan­ted” sa batas.   

Sa panayam kay Atty. Trixie Angeles, abogado ni Faeldon, hindi na nila hina­rang pa ang pagpapalabas ng warrant of arrest laban sa kanyang kliyente dahil mas mainam na maaresto ito para masiguro ang ka­lig­tasan nito.

Sinabi pa ni Angeles na base kasi umano sa naka­rating sa kanilang impor­masyon, pabalik na umano ng Marine Headquarters sa Fort Bonifacio si Faeldon dakong alas-2 ng hapon sa kasagsagan ng Manila Pen standoff at mula noon ay hindi na nakita pa.

Lubusang nag-alala naman umano si Angeles na posibleng may bumihag kay Faeldon at pinapala­bas lamang na tumakas ito.

Magugunitang nakita pa si Faeldon na kasama nina Sen. Antonio Trillanes 1V na nagmamartsa sa kahabaan ng JP Rizal Avenue patungong Manila Peninsula Hotel makara­ang mag-walkout ang Magdalo soldiers sa korte noong November 29.

Matapos ang mahigit sa anim na oras na standoff sa Manila Pen at ma­aresto ang mga miyembro ng muling nag-aklas na sun­dalong Magdalo ay hindi na nakita pa si Faeldon.

Nabatid na si Faeldon bukod pa kay Trillanes ay itinuturing na isa sa “5 hard core” leader ng Magdalo. 

Maliban kay Faeldon, pinaghahanap din sina Army T/Sgt. Elmer Colon, ang sundalong naka-wig sa standoff sa Manila Peninsula; Marine SSgt. Noel Aggalut; Marine Cpl. Jer­son Alabata; Marine Private First Class Monchito Lusterio; Josil Regulacion; at Abraham Apostol. 

Nauna nang nagpala­bas ng P1-M reward ang pamahalaan para sa sinu­mang makapagbibigay ng impormasyon sa ika­da­rakip nina Faeldon. (Rose Ta­mayo-Tesoro/Joy Cantos)