Sinabi ni Mantaring na mas pinili nito na manatili sa kanyang kasalukuyang inuupahang tanggapan sa 2nd floor ng NBI Annex building kaysa gamitin ang tradisyunal na opisina ng mga dating director sa 3rd floor ng NBI main building sa Taft Avenue, Ermita, Maynila.
Hindi naman umano siya naniniwala na may "bad feng shui" ang director’s office, subalit mas komportable anya siya na ang kasalukuyan niyang opisina ang nagbibigay sa kanya ng suwerte na inokupahan niya noon pang taong 2000 pa bilang Deputy Director for Comptrollership, Assistant Director, Officer-in-Charge (OIC), Acting Director at ngayo’y NBI Director.
Balak ni Mantaring na i-convert ang director’s office sa isang museum at ilagay dito ang mga "accomplishment" o memorabilia ng mga dating director na paraan na rin umano niya upang parangalan ang mga pinalitang director.
Apat na dating director ang nasawi sa loob ng dating tanggapan kabilang sina Reynaldo Wycoco, Antonio Aragon, Santiago Toledo at Federico Opinion.
Si Sen. Alfredo Lim na naging NBI director rin ay komunsulta umano sa feng shui experts at hindi nanatili sa nasabing tanggapan at hanggang ngayon ay nagsisilbi pa sa bayan. (Danilo Garcia)