Sa isang panayam sa ANC Television, sinabi ni Rep. Jaworski na may mga testigo siyang makakapagpatunay na nakakakuha ng pera mula sa shabu si Eusebio, subalit tumanggi naman itong pangalanan at kung magkano ang perang tinatanggap umano ni Eusebio mula sa illegal na droga.
Agad namang pinabulaanan ni Eusebio ang akusasyon at ayon sa alkalde, gusto lamang sumikat ng batang Jaworski kaya pilit siyang iniuugnay sa isyu ng droga.
Ayon pa kay Jaworski, umabot sa dalawang kilong shabu ang nabenta sa kontrobersiyal na "shabu talipapa" kung saan nasa P10 milyon ang kita araw-araw.
Samantala, ayon naman sa isang mapagkakatiwalaang source, kaya agad na ipinagiba ang nasabing "shabu palengke" ay upang hindi mahalata ang paghukay sa 10 kilo ng shabu na nakabaon sa nasabing lugar.
Bagaman at hindi kumpirmado ang nasabing ulat, sinabi ng source na hindi imposibleng may mas malalim na dahilan sa mabilisang pagpapagiba sa shabu palengke.
Magugunitang si Eusebio ang nag-utos na gibain kaagad ang naturang tiyangge ng droga kahit na kailangan pa itong gamitin para sa pagkuha ng mga ebidensiya.
Ipinagtanggol naman ni Justice Sec. Raul Gonzalez si Eusebio dahil mayroon anyang karapatan ang mayor na ipagiba ang anumang istraktura na makakasama sa kanyang nasasakupan. (Malou Escudero)