Kabayan malalaglag sa 'gov't of unity' ni GMA

Nagpaplano umano ang K4 coalition ni Pangulong Arroyo na ilaglag ang kandidato nitong bise presidente na si Noli de Castro dahil sa "government of unity" o pamahalaan ng pagkakaisa na itatatag nila pagkaraan ng halalan.

Ito ang tahasang ipinahayag ng mga haligi ng K-4 na nagsabing kailangang bitiwan nila si de Castro upang di makasira kay Pangulong Arroyo sa iba pang kandidato ng K-4.

Itatayo ni Pangulong Arroyo ang isang "government of unity" kung saan ang mga miyembro ng oposisyon ay bibigyan ng puwesto at tutulong sa pagpapatakbo ng gobyerno.

Ayon sa mga taga-K4, magkakaroon ng aktibo at mahalagang papel ang sinumang mananalo bilang bise presidente kaya kailangan umano ang isang may silbi at may pakinabang na pangalawang pangulo at hindi umano magiging katiwa-tiwala ang isang government of unity kung si de Castro ay kasali dito.

Sa lahat ng survey, habang umaakyat sa rating si Pangulong Gloria laban kay Fernando Poe, Jr. patuloy naman ang pagdausdos ni de Castro dahil ang kanyang lamang ay mabilis na nginangatngat ni Loren Legarda. Ang dahilan nito, ayon sa mga taga-K4, ay ang tambak na reklamo at demanda sa Ombudsman at sa korte laban dito. (Ulat ni Ellen Fernando)