Larawan ng mga terorista ipapaskil

Upang mapabilis ang pagdakip sa mga kinatatakutang miyembro ng mga terorista kabilang na ang dayuhang Jemaah Islamiyah (JI) ay nakatakdang ipalabas ng bagong tatag na National Anti-Terrorism Task Force ang larawan ng nasabing mga banta sa pambansang seguridad.

Malaki ang paniniwala ni Defense Secretary Eduardo Ermita, pinuno ng naturang task force, na isang epektibong paraan ang paglalantad sa publiko sa pagkakakilanlan ng mga terorista upang mapadali ang pagdakip sa mga ito.

Aniya, subok na ang ganitong pamamaraan na una nang ginawa ng National Anti-Kidnapping Task Force (NAKTAF) na patuloy ang matagumpay na operasyon sa pagbitag sa mga wanted na kidnappers.

Nilinaw naman ng kalihim na kailangang suportado ng matitibay na intelligence report ang naturang hakbang dahil bago nila ilantad sa publiko ang litrato ng mga terorista ay kailangan munang makumpirmang sangkot ang mga ito sa terorismo.

May 30 pang teroristang JI ang sinasabing nagtatago sa mga kampo ng MILF sa Mindanao at pakay ng pagtugis ngayon ng mga awtoridad.

Kasalukuyang pinag-aaralan ang pagkakaloob ng ‘reward system’ sa ikatatagumpay ng kampanya kontra terorismo. (Ulat ni Joy Cantos)