Jokic, Nuggets mitumba sa Pelicans sa overtime

CEBU, Philippines — Ang alas sa Denver nga si Nikola Jokic namawi sa mabugnaw niyang sinugdanan aron pagposte og 27 puntos nga triple-double sa dihang ang Nuggets mi-rally aron pakagingon ang New Orleans Pelicans, 132-129, sa overtime sa kulbahinam nilang duwa sa NBA kagahapon didto sa Smoothie King Center sa New Orleans, Louisiana.

Si Jokic, nga milangkat sa ikatulo niyang MVP award sud sa upat ka tuig sa miaging season, midugang og 13 ka rebounds ug 10 ka assists.

Mi-iskor lamang siya og sayes puntos sa first half hinungdan nga ang Nuggets nabiyaan og 17 puntos sa ikatulong kuwarter.

Apan ang Nuggets milusad og mainit nga resbak aron ilogon ang labaw, 111-109, kortesiya sa layup ni Julian Strawther sa nahibilin nga 4:37 left sa regulasyon.

Nakalabaw og balik ang Pelicans, 119-117, apan si Denver guard Jamal Murray mitabla sa iskor, 119-119, sa nahibilin nga nuybe segundos.

Duna untay tsansa ang Pelicans nga modaog apan nasipyat ang 3-pointer ni CJ McCollum dayong kapupos sa oras hinungdan sa overtime.

Misalida dayon si Jokic pinaagi sa pagkadlit sa nag-unang sayes puntos sa Nuggets sa dugang singko minutos sa makutas nga aksiyon.

Wala na molingi pa sukad niadto ang Nuggets aron tunolan ang Pelicans sa ikapito niining sagunson nga pilde.

Si Murray mipupo sab og 27 puntos alang sa Nuggets samtang si Russell Westbrook miamot og 21 puntos.   

Sila si Jordan Hawkins ug McCollum nagkumboya'g 49 puntos sa pilderong Pelicans.

Sa laing duwa, ang Indiana Pacers miangkon sa ikaupat nilang sagunson nga daog human gilampornas ang Kings, 122-95, didto sa Sacramento.

Si Pascal Siakam mikolekta og 19 puntos ug 10 ka rebounds alang sa Pacers  nga mipabuto og 70 puntos sa second half aron ilubong ang Kings og 27               puntos.

Si Myles Turner mihipos og 14 puntos, sila si Tyrese Haliburton ug Ben Sheppard miamot og 14 puntos matag usa, samtang si T.J. McConnell midonar og 12 puntos ug 10 ka assists alang sa Pacers.

Si De'Aaron Fox mirehistro og 23 puntos samtang si Domantas Sabonis midugang og 17 puntos ug 21 ka rebounds apan nangahoyhoy ang ilang abaga gumikan kay ang Kings misukarap sa ikaupat nga sunod-sunod nga higayon.

Didto sa Toronto, ang Houston Rockets mipapas sa 16 puntos nilang alkansi sa first-half aron payak-on ang Raptors, 114-110.

Si Dillon Brooks maoy nangu sa Rockets uban ang 27 puntos samtang si Fil-Am Jalen Green mitimbre og 22 puntos.

Mihimo sab og kasikas si Alperen Sengun bitbit ang 17 puntos ug 10 ka rebounds alang sa Rockets.