CEBU, Philippines — Dili lamang sila mahiligon og sports apan hasta sab pagpangga sa kalikupan.
Sul-ot ang opisyal nga sanina sa ilang koponan, ang mga sakop sa OCCCI Junior Sheermasters basketball teams gikan sa 12 ngadto sa 18 Under age groups ubos sa pagtimon ni head coach Noel Mascariñas mihimo sa ilang weekend nga mabulokon pinaagi sa pagpangolekta og basura didto sa lapyahan sa Brgy. Bantigue ngadto sa Panalian, Ipil sa siyudad sa Ormoc agi'g suporta sa International Coastal Cleanup 2024.
Bisan og nakabase sila sa Ormoc, ang OCCCI aktibo kaayo sa eksena sa Cebu sports. Kanunay silang moapil sa mga komersiyal ug uban pang mga liga sa Sugbo, ang labing uwahi mao ang Sinulog Cup 2024 niatong Enero diin ang Sheermasters mitapos nga first runner-up.
Sa kinatibuk-an, kapin sa 100 ka volunteers gikan sa management ug staff sa Metro Ormoc Community Multi-Purpose Cooperative (OCCCI) nga gipangulohan ni SHEER Advocacy Officer Joel Hinay, District Managers Roger Siaboc, Aisa Dumalag, ug Eugene Resurrecion, ug Ormoc Branch Manager Rio Plaba ang miduyog sa dalaygong kalihukan inabagan sa lokal nga kagamhanan sa dakbayan sa Ormoc ug sa Environment and Natural Resources Office (ENRO).
Ang mga batan-ong atleta namunit og mga sagbot ug uban pang linabay ug midasig sa kauban nilang mga basketbolista nga motabang paghulma og usa ka limpiyo, luwas, ug malipayon nga lugar alang sa tanan.
Ang masadigon nilang partisipasyon testamento nga sila mga maayong ehemplo sa adbokasiya sa OCCCI nga mao ang SHEER kon Sports, Health, Education, Environment, ug Resiliency.
"It does not only serve as a platform for OCCCI to strengthen its cause for environmental stewardship and sustainable practices but also provides the volunteers with deeper connection to their local coastal areas and develop the sense of responsibility to protect and conserve them," dason pa ni Hinay.
Ubos sa tema nga "Clean Seas for Blue Economy", ang ubang mga sanga sa OCCCI lukop nasud nagdungan pagsalmot ning mahinungdanong aktibidad.