CEBU, Philippines — Miabot na ang adlaw sa paghukom alang ni two-time world champion Melvin Jerusalem (22-3, 12KOs) sa dihang depensaan niini ang iyang WBC minimumweight title batok sa way pildeng Meksikanong challenger nga si Luis Castillo (21-0-1, 13KOs) sa main event sa "Blow-By-Blow" fight card ni boxing legend Manny Pacquiao karong adlawa, Septiembre 22, didto sa Mandaluyong City College gym.
Napuno sa kadasig, ang 30-anyos nga si Jerusalem misaad nga ang miagi niyang makabuak sa dughan nga kasinatian dili na mahitabo og usab.
Si Jerusalem misakmit sa korona sa WBO 105-pound division human gi-knockout ang Hapon nga si Masataka Taniguchi sa ikaduhang hugna niadtong Enero 6 sa miaging tuig didto sa Edion Arena sa Osaka, Japan.
Apan upat ka bulan ang milabay, ang garbo sa Manolo Fortich, Bukidnon nahuboan sa iyang bakos human gipaundang sa ikapitong hugna sa Amerikanong si Oscar Collazo sa una niyang depensa niadtong Mayo 27, 2023 didto sa Fantasy Springs Casino sa Indio, California.
Mao kini ang buot likayan ni Jerusalem ilabi na kay mo-away siya atubangan sa iyang mga kababayan.
"Dako ni nga opportunity para nako nga dire sa atoa ang dula," matud pa ni Jerusalem nga modepensa sa unang higayon sa WBC title nga iyang nasakmit human midaog piaagi sa split decision batok sa Hapon nga si Yudai Shigeoka niadtong Marso 31 didto sa International Conference Hall sa Nagoya.
"Ipasalig nako sa tibuok Pilipinas nga maningkamot ko og maayo ug buhaton tanan kutob sa akong mahimo nga madepensahan ang ako belt," dugang pa ni Jerusalem.